Xiinxala Hammatama Tarsiimolee Dubbisuu, Dandeettii Dubbisuu Keessatti: Barnoota Afaan Oromoo Kutaalee 7ffaafi 8ffaa Irratti Kan Xiyyeeffate

Abstract

Kaayyoon qorannoo kanaa Hammatama tarsiimolee dubbisuu, dandeettii dubbisuu barnoota Afaan Oromoo Kutaalee 7ffaafi 8ffaa xinxaluudha. Saxaxni qorannichaa ibsaadha. Malli qorannoo kana geggeessuuf dhimma itti ba’ame immoo, mala akkamtaa yoo ta’u, maddi ragaalee qorannichaa madda ragaa tokkoffaati. Madda ragaalee irraa odeeffannoo walitti qabuuf malleen funaansa ragaalee hojiirra oolan sakatta’a kuufatootaafi af-gaaffii barsiistotaati. Ragaalee walitti qabaman xiinxaluudhaan akka hubatametti, barattoota onnachiisuuf dubbisoonni dirreewwan barnootaa addaa addaa kanneen akka saayinsii uumamaa, saayinsii hawaasaa, aadaafi teknoloojii of keessatti hammachuun kan dhihaatan yoo ta’an, gilgaalotni tarsiimoolee dubbisuu shaakalchiisuuf dhihaatan immoo, yeroo wal bira qabaman gilgaalota tarsiimoolee dubbisuu kanneen akka gadi fageenyaan dubbisuu shaakalchiisaniifi gilgaalota bal’inaan dubbisuu shaakaluu affeeraniif xiyyeeffannoon hin kennamne. Akkasumas, tamsa’inni gilgaalota tarsiimoolee dubbisuu gadi fageenyaan dubbisuu shaakalchiisaniifi bal’inaan dubbisuu shaakaluu affeeran kankutaalee lamaanii ciccitaa yoo ta’u, kutaa 7ffaa gara 8ffaattis dagaagina kan hin qabneedha. Argannoo qorannichaa bu’ureeffachuun yaboon dhihaatanis, barsiistonni yeroo barsiisanis ta’ee yeroo karoora barnootaa qopheessan, shaakaloota tarsiimoolee dubbisuu gadi fageenyaan dubbisuu shaakalchiisaniifi bal’inaan dubbisuu shaakaluu affeeran qopheessuun otoo tarsiimoolee dubbisuutti dhimma ba’uu shaakalchiisanii gaariidha. Gama biraatiin immoo, qopheessitoonni kitaaba Afaan Oromoo kutaalee 7ffaafi 8ffaa qabiyyee danddeettii dubbisuu tarsiimoolee dubbisuu shaakalchiisanii xiyyeeffannoo keessa galchuun maxxansa itti aanutti fooyya’ee akka maxxanfamu gochuun gaarii ta’a.