‘Qaaccessa Faaruu Qunnii Buqqifannaa Shamarran Oromoo: Kutaa Magaalaa Sulultaa Aanaa Abbaa Gadaa Irratti Kan Xiyyeeffate‟

Abstract

Qorannoo mata dureen isaa “Qaaccessa Faaruu Qunnii Buqqifannaa Oromoo: Kutaa Magaalaa Sulultaa Aanaa Abbaa Gadaa Irratti Kan Xiyyeeffate,” jedhu kana gaggeessuudhaaf waanti qorattuu kana kakaase afoolli afaaniin dhaloota irraa gara dhalootaatti waan darbuuf sababa ammaayyummaafi guddina saayinsiifi teekinoloojiin walqabatee jijjiiramuufi dagatamuu waan danda‟uuf qorannoo irratti geggeessuun dhaloota dhufuuf bifa barreeffamaan olkaa‟uudha. Kaayyoon gooroo qorannoo kanaas faaaruu qunnii buqqifannaa shamarran Oromoo qaaccessuudha. Saxaxni qorannoo kanaas saxaxa ibsaa yommuu ta‟u, malli qorannichaa immoo mala qorannoo akkamtaadha. Maddi ragaa qorannoo kana geggeessuuf dhimma itti bahame madda ragaa tokkoffaa yoota‟u, iddattoon qorannoo kanaa maanguddootaafi shamarran Oromoo kutaa magaalaa Sulultaa aanaa Abbaa Gadaa keessa jiraatanidha.Malli iddatteessuu qorannoo kanaa immoo miti-carraa keessaa mala akkayyoofi darbaa dabarsaati.Malleen funaansa ragaalee afgaaffiifi marii gareeti. Bu‟aan qorannoo kanaan bira ga‟aman: ga‟ee faaruun qunnii buqqifannaa hawaasummaa cimsuu keessatti qabu walgorfachuu, waljajjabeefachuu, yarummaa yookiin doqnummaa balaaleffachuu; wantoota safuu cabsan, aad-malee ta„an, kan jiruufi jireenya dhala namaatiif danqaa ta„anirraa waldeeffachuu, hawwii, eebba, ulfina yookiin kabaja, kabaja ofii eeggachuun jiraachuu, gootummaa, komachuu, jaalala, yeroo isaanitti fayyadamuu, ofitti boonuu, waliif yaaduufi warra namni jalaa du‟e jajjabeessuu ibsuuf dhimmaa kan itti ba‟ani ta‟uu adda ba‟eera. Ga‟ee faaruun qunnii buqqifannaa gama dinagdee jajjabeessuutiin qabu jabaatanii hojjachuun badhaafamuu, qabeenyaan guddachuu/gahoomuu, namoota biraa deeggaruu, qabeenyi madda gammachuufi kabajaatti ilaalamuu ta‟uufi ga‟ee faaruun qunnii buqqifannaa gama siyaasa keessatti himaachuun qabu keessaa afwalaloo fayyadamuun qaama isa miidhe qeequun akka jiru, gabrummaa ofirraa faccisuu, tokkummaa qabaachuu akka qaban, quuqqaa garaa isaanii ittiin baafachuu akka danda‟an bira ga‟ameera. kanaaf, faaruun qunnii buqqifannaa shamarran Oromoo kun dhalootaa dhalootatti akka darbuuf namni hundi dirqama irraa eegamu bahuutu irraa eegama.