Xiinxala Fookiloorii Sirna Awwaalchaa aanaa Dandii

Abstract

Qorannoon kun mata duree „„Xiinxala Fookiloorii Sirna Awwaalchaa Aanaa Dandii yoo ta‟u, Saxaxni qorannoo kanaaf dhimma itti bahames mala akkamtaati. Sababiin malli kun filatameefis ragaan argame xiinxalamuun kan ibsamedha. Ka‟uumsi qorannoo kana sirni awwaalchaa sababoota garaagaraa kan akka ammayyummaatiin jijjiirramuu qabiyyee isaati. Gama biraatiin, duudhan sirna awwaalchaa dhugaan isaa qoratamee barreeffamaan bal‟inaan kan taa‟e hin jiru. Kana barreeffamaan akka taa‟ee dhalootaaf darbu gochuun barbaachisummaa qorannoo kana yoo ta‟u, Kaayyoon gooroo qorannichaa xiinxala fookloorii sirna awwaalchaa aanaa Dandii ti. Kana galmaan ga‟uuf maddi ragaa qorataan dhimma itti ba‟e, madda ragaa tokkoffaati. Maddi raga kunis hawaasa aanaa Dandii keessaa iddattoowwan filataman manguddoota, abbootii gadaafi hayyoota yemmuu ta‟an, iddattoowwan kanneen filachuuf tooftaalee iddatteessuu miti carraa ta‟ee, mala iddattoo kaayyeffataafi darbaa dabarsaatti dhimma bahee jira. Iddattowwan filataman irraa odeeffannoon meeshaalee funaansa ragaa daawwannaa, af-gaaffiifi marii garee xiyyeeffataa yoo ta‟u, gaaffilee akka duudhaaleen sirna awwaalchaa keessatti maal akka ta‟an, meeshaaleen aadaa sirna awwalchaa keessatti tajaajilan fakkoommii maalii akka qaban, aartiin ogummaa sochii qaamaa sirna awwaalchaa irratti mul‟atan hiikoo maalii akka qabaniifi ogafaan sirna awwaalchaa keessatti dhimma itti ba‟aman ergaa maalii akka dabarsan bira ga‟ameera. Yaadiddamoota kanneen akka daayeessa Aadaa Hawaasaafi Dayeessa Fayyadeessummaatti dhimma ba‟uun xiinxalamuun, argannoowwan qorannoo kanaas duudhaaleen sirna awwaalchaa aanaa Dandii keessatti mul‟atu hirmii baafannaa,reeffa kafanuu,midhaan warra du‟aa qopheessuu,biyyoo argachiisuu,eebbisuu, Meeshaaleen aadaa sirna awwaalchaa irratti dhimma itti bahaman jirbiidhaan gannasuun jireenyi nama sanaa sochii kamiyyuu dhaabuutti,abujadee adiidhaan kafanuun jireenyi nama sanaa gahee dhaabbachuutti,uffanni gadda namni du‟e sun dukkana keessatti galuutti,sibiilli sanduqa reeffaa keessa kaa‟amu ittistuu budaatti, sanduuqni reeffaa mana galgalaatti kan fakkeeffamudha. Aartiin sochii qaamaa sirna awwaalchaa mataa qabachuun badiitti, harkaan dugda qabatanii gad jechuun nama du‟e sana barbaaduutti, harka facaasuun komii waaqaaf dhiyeessuutti, harkaan afaan qabachuun waan dubbatan wallaaluutti kan hiikamuufi ogafaan sirna awwaalchaa ani badeen namni sun narraa adda bahuun isaa naballeesse, oofaniin namni sun oofamee fageeffamuufi duubdeebii kan hin qabne ta‟uu,eebbi namoonni maatii nagaatti akka galan hawwuu ergaa kan ittiin dabarsan ta‟ee,yaboon qorannichaas duudhaaleen hawaasaa mul‟atan, fakkoommiin meeshaalee aadaa,hiikoon aartii ogummaa sochii qaamaafi ergaan ogafaan sirna awwaalchaa dhimmoota falaasama hawaasa aanichaatiin waan walqabatuuf kunuunfamee dhaloota dhufuuf osoo dabarfamee baay‟ee gaariidha.