Xiinxala Ga‟umsa Gaaffilee Qormaata Barnoota Afaan Oromoo Kutaa 8 Bara 2015”

Abstract

Kaayyoon gooroo qorannoo kanaa ga‟umsa gaaffilee qormaata Barnoota Afaan Oromoo kutaa 8 bara 2015 xiinxaluun ibsuudha. Saxaxni qorannoo kanaa qorannoo makaa ibsaa yoo ta‟u, malli qorannoo kana geggeessuu keessatti hojiirra oole mala qorannoo makaati. Maddi ragaa qorannichaas, madda ragaa lammaffaati. Ragaan qorannoo kanaa mala xiinxala dookimantiin funaaname. Malli iddatteessuu dhimmi itti ba‟ame carraa salphaafi akkayyoodha. Mala iddatteessuu carraa salphaatti fayyadamuun kutaalee magaalaa Finfinnee jiran keessaa kutaalee magaalaa „Nifaas Silk Laaftoofi Kolfeen filatamanii jiru. Mala iddatteessuu akkayyootti gargaaramuun immoo, manneen barnootaa kutaalee magaalaa lamaan keessaa ja‟a(6) ta‟antu filatamanii jiru. Ragaaleen xiinxala dookimantiin walitti qabamanis mala akkamtaafi hammataan qaacceffamanii jiru. Argannoowwan qorannoo kanaan adda baafamanis: ulfaatinni gaaffilee qormaata barnoota Afaan Oromoo xummuraa sadarkaa Giddugaleessaa Kutaa 8ffaa bara 2015 Bulchiinsa magaalaa Finfinnee qoramanii harki caalaan yookiin 36 (%62) rakkoo akka qabu hubatameera. Gaaffileen baay‟een qormaata kanaa yookiin 47 (%81) gama humna dandeettii barattoota adda baasuutiin gaarii ta‟uu bira ga‟ameera. Gama gaarummaa filannoowwaniitiinis gaaffilee kunneen baay‟een yookiin 228 (%98.3) fudhatamoo akka ta‟an adda ba‟eera. Haata‟u malee, gaaffiin qormaataa tokko guutummaatti gaariidha kan jedhamu yoo qabxiilee sadan jechuunis ulaagaa ulfaatinaa, humna barattoota adda baasuufi gaarummaa filannoowwanii guutee argamedha. Rakkoo gaaffileen qormaataa kun qaban furuuf, qaamni qormaata kana qopheessuu osoo gaaffilee qormaataa hinqopheessiin gaaffileen qophaa‟aan sadarkaa dandeettii barattootaa waliin akka deemuuf dandeettii barattootaa itti dhiheenyaa hordofuufi adda baasuun hubachuu. Gaaffileen qormaataa qophaa‟an dandeettii barattoota cimoofi suuta baratoo akka adda baasuu danda‟utti qopheessuuf humna tokkoon tokkoon gaaffilee qormaatichaa xiyyeeffannoo keessa galchuu danda‟uu. Tokkoon tokkoon filannoo gaaffileef dhiyaatan akkaataa gaaffilee qormaatichaa waliin deemuun danda‟uutti qindeessuu. Tokkoon tokkoon gaaffileefi filannoowwan qormaatichaa gadi fageenyaan dubbisuun: Gulaaluun dogoggora jiru sirreessuufi qajeelfamoota ifoofi barbaachisoo ta‟an kennuu mirkaneessuu danda‟uudha.