Qaaccessa Walaloo Edas-Edanas: Ija Yaaxxina Bifiyyeetiin

Abstract

Kaayyoo gooroon qorannoo kanaa walaloo Edas Eadans ija yaaxxina bifiyyeetiin qaaccessuudha. Qorannoon kun mala akkamtaa ta’ee qorannoo ibsaatiin hojiirra oole. Malli iddatteessuu qorannoo kana keessatti dhimma itti bahame miti carraa keessaa akkayyoo yommuu ta’u, madda ragaa tokkoffaatu dhimmabahame. Innis, kitaaba ‘Edas Edanas’ jedhamu keessaa ragaaleen funaanamuun qaacceffamaniiru. Tooftaaleen ragaan ittiin funaanaman xiinxala hafeewwanii walaloo keessaa fudhatamaniiti. Ragaaleen funaanaman, mala akkamtaatiin qaacceffamanii dhiyaataniiru. Qorannoo hojjatame keessatti malleen dubbii kanneen akka akkasaa, nameessuu, habalaka, iddeessuu, nameessuu, arbeessuu, mitiyyeefi walqabsiisuu fayyadamuun barreeffamaniiru. Akkasumas, malaawwan barruu: addeessuu, hima egeree, duubdeebisa, waliin haasaafi ofiin haasaa jedhaman kitaaba kana keessatti hojiirra ooluu isaanii hubatamee jira. Dabalataanis, suuressuuwwan adda addaa: suuressuu argee, suuressuu dhageettii, suuressuu fuunfannaa, suuresssuu qaqabannaa, suuressuu qaama keessoofi suuressuu sochii walaloo kana keessatti dhimma itti bahamaniiru. Kun ammoo, miidhagina walaloo kanaatiif gahee guddaa taphateera. Kana malees, irraa maqiinsi dhugummaa sadarkaa himaatti, irraa maqiinsi siyaasaa, irraa maqiinsi abshaalummaa mul’ataniiru.Walumaa galatti, dhimmooni kunniin akka malleewwan dubbii, malaawwan barruu, suuressuufi irraa maqiinsi walaloo kana keessatti argaman miidhaginaafi fudhatamummaa kitaaba kanaatiif gatii guddaa kennaniirru