Xiinxala Itti Fayyadama Afaanii Asoosama ‘Rakkinni Haa Rakkatu’ Jedhu Keessatti

Abstract

Qorannoon kun mata-duree “Xiinxala itti fayyadama afaanii asoosama „Rakkinni Haa Rakkatu‟ jedhu irratti xiyyeeffatee kan gaggeeffamedha. Kaayyoon qorannoo kanaa inni gooroon itti fayyadama afaanii Asoosama „Rakkinni haa Rakkatu‟ keessatti argamu xiinxaluudha. Kaayyoo yaadame kana galmaan ga‟uufis mala qorannoo akkamtaatti dhimma bahameera. Mala qorannoo akkamtaa kana bu‟ura godhachuun qorattuun ragaalee hojii qorannichaatiif barbaachisan hunda kitaaba qorannichaaf filatame sakatta‟uun walitti qabattee jirti. Ragaalee haala kanaan funaannatte kanneenis mala qorannoo ibsaatti gargaaramuun qaaccessitee jirti. Gama kaaniin dhimmoota adda addaa hubachiisuuf jecha yaadoleefi filannoo jechootaa bakka barbaachisaatti galuun argaman tajaajila isaan qaban adda bahuun mala akkamtaafi ibsaatiin xiinxalamanii jiru. Haaluma kanaan bu‟aan xiinxala qorannoo kanaa akka mul‟isuttii malleen dubbii adda addaa gargaaramuun akkaataa qabiyyeefi ergaan barbaadaman hubatamaa ta‟anii darbuu danda‟anitti qindoomina olaanaadhaan ijaaramaniiru. Kana malees, barreessaan asoosamichaa yeroofi bakka barbaachisaa ta‟ee argametti itti fayyadama afaanii keessatti mammaaksa garaagaraatiin yaada dhokataa ta‟e ifoomsee ergaa bal‟aa ta‟e ittiin dabarsuu isaatu mul‟ata. Itti fayydama jechamootaatiinis haalli ittiin ergaan barbaadame darbe karaa dubbistootaaf ifa ta‟uun dhiyaachuun isaa xiinxala qorannichaa keessatti mul‟ateera