Qaaccessa Ergaa Ogafaan Ayyaana Irreecha Tulluu Annannoo: Godina Shawaa Lixaa Aanaa Dandii Irratti Kan Xiyyeeffate

Abstract

Qorannoon kun mata duree “Qaacceessa Ergaa Ogafaan Ayyaana Irreecha Tulluu Annannoo Godina Shawaa Dhihaa Aanaa Dandii” jedhurratti geggeeffame. Kaayyoo gooroon qorannoo kanaas ergaa ogafaan ayyaana Irreecha Tulluu Annannoo qaacceessuudha. Kaayyoo kana galmaan gahuuf, malli qorannoo akkamtaa hojii irra ooleera.Maddi ragaalee qorannoo kanaa madda ragaa tokkoffaati. Innis manguddoota Oromoo Aanaa Dandii keessatti argaman kanneen kabaja ayyaana Irreecha Tulluu Annannoo irratti hirmaataniifi hubannoo bal’aa kan qabanidha. Akkasumas, malli iddatteessuu qorannoo kanaa mala iddeetteessuu carran alaa ta’ee kaayyeeffataadha. Sababni isaas qorataan namoota ragaa kennuu danda’an filatee itti fayyadamuu waan danda’ee fidha. Qorannoo kana geggeessuu keessatti meeshaaleen ragaalee funaanuuf dhimma itti ba’aman afgaaffii, marii gareefi daawwannaadha. Argannoon qorannoo kanaas, ergaan ogafaan galateeffannaa ayyaana Irreecha Tulluu irratti dhiyaatu rakkoowwan waqtii Bonaa keessa mudate keessaa nama baasee roobaafi jiidha Arfaasaatiin kan gahe galateeffachuufdha. Akkasumas, ergaan ogafaan kadhannaa kabaja ayyaana Irreecha Tulluu yeroo roobni roobuu didee lafti gogu akka roobuufi bara lolli hammaatu biyyi nagaa akka taatu’u dabarsuudha. Dabalataanis, kan wanta gara fuulduraatti barbaadaniifi hawwan Waaqa irraa argachuuf kan gaggeeffamu yookiin kadhatamudha. Akkasumas, faaruun Irreechaa Tulluu ardaa jilaa wiirtuu ardaa jilaa Oromoon bahee itti Waaqa galateeffataniifi kadhatan kan ofkeessaa qabudha. Hayyoonni hawaasa Aanaa Dandii kanneen akka jaarsoolii biyyaa, abbootii Gadaa, haawwan siiqqee waa’ee galateeffannaa, kadhannaafi faaruuwwaan ayyaana Irreecha Tulluu irratti dhiyaate akka hin dagatamneef ilmaan isaanii qabsiisuun dhalootatti dabarsuu qabu. Barreesitoonni Oromoo duudhaa ogafaan ayaana Irreecha Tulluu ilaalchisee jiru irratti qorannoo bira darbanii kitaabota irratti maxxansuun bu’aa isaanii karaa sabaa himaaleetiin hawaasa bal’aa biraan gahuu qabu.