Xiinxala Rakkoolee Dandeettii Keeyyata Barreessuu Keessatti Barattoonni Kutaa 9ffaa Qaban Mana Barumsaa Caggoo Sadarkaa 2ffaa Irratti Xiyyeeffachuun

Abstract

Ogummaa keeyyata barreessuu gonfachuuf hubannoon keeyyatarratti qabnu murteessaadha. Kaayyoo gooroon qorannoo kanaas rakkoolee dandeettii keeyyata barreessuu keessatti barattoonni kutaa 9ffaa qaban xiinxaluudha. Kaayyoo kana galmaan ga’uuf malli qorannoo dhimma itti ba’ame mala qorannoo walmakaa jechuun akkamtaafi hammamtaati. Sababni isaa odeeffannoon qorannoo kanaa karaa lakkoofsaafi jechaan kan ibsame waan ta’eefidha. Tooftaan iddatteessuu dhimma itti ba’ame ammoo tooftaa iddatteessuu kaayyeffataafi tooftaa iddatteessuu carraa tasaati. Meeshaaleen ragaa funaanuuf dhimma itti ba’ame, qorumsa, afgaaffiifi mariigareedha. Argannoowwan qorannoo kanaan bira ga’aman akka ibsanitti, keeyyata barreessuurratti dandeettiin barattoonni baay’een qaban gadaanaa ta’uu,keeyyanni barattoonni barreessan garri caalu ulaagaa amaloota keeyyata gaarii guutuudhabuu,tartiiba ijaarsa keeyyata eeganii barreessuurratti barattoonni hedduun ga’umsa kan hinqabneefi barsiisonni barattoota keeyyata barreessuu hanga barbaadamu shaakalchiisaa kan hinjirre ta’uudha.. Haaluma kanaan barattoonni keeyyata barreessuu keessatti rakkoolee adda addaa akka qabaniifi fedhiin isaan keeyyata barreessuuf qaban gadaanaa ta’uu qorannoo kana keessatti ibsame jira. Kunis, barattoonni hedduun rakkoo ulaagaa amala keeyyata gaarii,rakkoo qindoomina yaadaa, rakkoo qubguddeessatti haalaan fayyadamuu dhabuu,rakkoo sirna tuqaalee, rakkoo qubeessuufi walqabsiiftuutti fayyadamuu akka qaban qorannoo kana keessatti ibsamee jira. Kanaafuu, rakkoolee dandeettii keeyyata barreessuu keessatti barattoonni qaban kana hambisuuf barsiisonniifi barattoonni xiyyeeffannoon baruufi barsiisuurratti ga’ee isaanii ba’uutu irraa eegama. Akkasumas,wajjirri barnootaa rakkoo kana hubatee wayitii barnoota Afaan Oromoof kennamu osoo fooyyeessee gaarii ta’a. Kanamalees, sadarkaa 1ffaa keessatti A faan Oromoo kan barsiisan kanneen Afaan Oromootiin leejii’an osoo ta’e gaariidha. Walumaagalatti rakkooleen barattoonni baay’een keeyyata barreessuu keessatti uuman bal’inaan qorannoo kana keessatti ibsamanii jiru.