Xiinxala Walaloo Sirboota Haacaaluu Hundeessaa Eenyummaafi Tokkummaa Oromoo Agarsiisan

Abstract

Qorannoon kun sirboota artiisti Haacaaluu Hundeessaa keessaa tokkummaafi eenyummaa agarsiisan irratti xiyyeeffata.Bu’uuruma kanaan, walaloon sirboota afur ta’an mala iddattoo kaayyeeffata irratti hunda’uun qorannoo kanaaf filatamaniiru. Qorannoon kun mala qorannoo akkamtaa keessaa xiinxala ergaa fayyadamuun ragaaleen ibsamaniiru. Yaadxinni qorannoon kun bu’uureeffate yaadxina hawaasummaa fayyadamuun ergaan ijoo walaloo sirbaa haala hawaasummaafi dinagdee keessa jiruu mul’isuun hiika isaa xiinxaluuf dhimma itti bahameera. xiinxala walaloo sirba tokkummaa Oromoo irratti gaggeeffameen ergaan ijoo isaanii tokkummaa dhabuu, godaansa, haqa dhabuu, miidhaa siyaasaafi dinagdee akka ta’e bu’aan qorannoo kun ni mul’isa. Ergaan ijoo sirba kana keessatti qorannoo kanaan argaman, reebicha, hidhuufi dararuu, qaama hirisuu, ajjeechaa, himannaa sobaaniifi ragaa sobaan murtii kennuu, barnoota irra ari’uu, sodaachisuufi dorsisuu,saamicha lafaa, lafa irra buqqisuun,eenyummaa isaa sarbuu isaan gurguddoodha. Miidhaafi dhiibbaan ummata Oromoo irra karaa hawaasummaa, siyaasaafi dinagdeetiin irra gahaa jiru jala bahuuf, kutaaafi amantiidhaan osoo wal hin qoodin tokkummaa isaa cimsee falmii gaggeessuun mirga abbaa biyyummaa isaa mirkaneffachuu akka qabu ergaan ijoo walaloo sirbaa kanaa bal’inaan ni mul’isa. Dabalatanis, sirboota Haacaaluu Hundeessaa tokkummaafi eenyummaa Oromoo irratti xiyyeeffatani bahan keessatti ergaan ijoo isaanii, gootummaa, tokkummaa, seenaa, biyya (Oromiyaa) faarsaan qorannoon kun mul’iseera.