Xiinxala Gaheedubartoonni Sirna Gadaa Keessatti Qaban: Godina Shawaa Dhihaa Aanaailuugalaan Irratti Xiyyeeffate

Abstract

Qorannoon kun xiinxala gahee dubartoonni sirna Gadaa keessatti qaban: Godina shawaa Dhihaa aanaa Iluugalaan irratti xiyyeeffatee adeemsifame. Ka'umsi qorannoo kanaa gahee dubartoonni sirna Gadaa keessatti qaban irratti qorannoon bal’aa geggeeffamuu dhabuu. kaayyoon gooroo qoranichaa gahee dubartoonni godina shawaa Dhihaa aanaa Iluugalaan sirna Gadaa keessatti qaban xiinxaluu yoo ta'u, Kaayyoon gooree qorannichaa: gahee dubartoonni sirna Gadaa keessatti qaban dhimma hawaasaa irratti xiyyeffatu, wantoota dubartoonni sirna Gadaa keessatti dhimma itti bahaniifi dubartoonni sirna Gadaa keessatti gahee isaanii akka hin baane wntoota gufuu ta'an xiinxaluu dha. Maddi ragaa qorannoon kun dhimma itti bahame madda ragaa 1ffaa: Abbootiii Gadaa, manguddoota Oromoo, haadholiifi haadha Siiqqee dha. Iddattoowwan filachuuf toftaalee iddatteessuu miti carraa keessaa mala iddatteessuu kaayyeffataafi darbaadabarsaatti dhima baatee jirti. Iddattoowwan filataman irraa tooftaalee funaansa ragaa: Afgaaffii, Mariigarefi Daawwannaatti dhimma ba'uun ragaan funaaname mala qorannoo akkamtaatiin qaacceffameera.Qaaccessa ragaa keessatti, yaadiddama fayyadeessummaa dhimma ba'uun ragaan haala walfakkaatuun qaacceffamee argannoo qorannoo kanaa bira ga'amee jira. Argannoowwan qorannoo kanaan bira ga’amanis:Aadaan hojii dubartoonni qaban hojii gamtaa(Daboo )ta'uu, dubarri qarree yemmuu heerumtu haati gurbaa argaa goromsa tokko sabbata furaa kan kennitu ta'uu, nyaataa fi dhugaatii qopheessuu, gurra uruu, shaashii maruu, yemmuu laga bu'an haati warraa Abbaa Gadaa okolee qabachuun seera guutuu gochuu, bulchiinsa Abbaa Gadaa kan hordofan ta'uu, dubarri qarree fi jaartiin cifiree eebbaaf kanfilataman ta'uu, Wantoonni sirna Gadaa keessatti dhimma itti ba'aman:okolee mallattoo hormaataa ta'uu, siiqqen mallattoo aangoo, araaraafi nagaa ta'uu akka mul'isu, Wantoonni dubartoonni gahee isaanii akka hin baane gufuu ta'an dhiibbaa hawaasaa fi amantii dha.Gahee dubartoonni sirna Gadaa keessatti qaban sababa dubartoonni amantii waaqeffannaan ala amantiiwwan biroo hordofan Gadaafi amantii waaqeffannaa ija tokkoon ilaaluun Gadaarraa kan qoolifatan ta'uu,dhiibbaa hawaasa keessa jiruun dubartoonni baay'ina hojii mana keessaan ko'oommachuun sirna Gadaa keessatti hirmaannaan isaanii laafuun ni mul'ata. Kanaaf, namoonni sirna Gadaa keessatti muuxannoofi hubannoo qaban midiyaan hubannoo dubartootaa cimsaa deemuufi barreeffamaan dhalootaaf dabarsuun barbaachisaa dha