Xiinxala Adeemsa Sirna Qarree Buusaa Dubartoota Oromoo Aanaa Tokkee Kuttaayee

Abstract

Qorannoon kun mata duree Sirna Qarre Buusaa Godina Shawaa Lixaa Aanaa Tokkee Kuttaayee irratti adeemsifame. Dhimmoonni garaa garaa akka qorattuun kallattii kanaan qorannoo gaggeessituuf ka’umsa ta’an jiru. Isaanis, Sirna Qarre Buusaa duudhaa Oromoo ganamaa dhaloota har’aatiif addeessuu, Sirni Qarre Buusaa yeroo ammaa bakka muraasatti darbee darbee waan mul’atuuf, akka bakka maratti deebi’ee raawwatamuufi akka hindagatamne ol kaa’uudha. Kaayyoo gooroon qorannoo kanaas, Sirna Qarre Buusaa Dubartoota Oromoo Aanaa Tokkee Kuttaayee Xiinxaluu dha. Gaaffiileen bu’uuraa qorannichaa immoo, kanneen akka yoomessa Sirna Qarre Buusaa, hirmaattota Sirna Qarre Buusaafi fakkoommiwwan meeshaalee aadaa Sirna Qarre Buusaa keessatti mul’atan xiinxaluu irratti xiyyeeffatu. Qorannoon kun mala akkamtaatti dhimma ba’amee gaggeeffame. Malli iddattoo qorannichaa mala iddatteessuu kaayyeffataati. Galma ga’insa qorannichaaf qorattuun kan fayyadamte madda ragaa tokkoffaati. Haala kanaan maanguddoota dhimma Qarre Buusaa irratti hubannoofi muuxannoo qaban, akkasumas namoota sirna kana raawwachuun muuxannoo qaban irraa odeeffannoo funaanuun dhimma baatee. Ragaaleen kallattii garaa garaan meeshaalee funaansa ragaalee kanneen akka daawwannaa, afgaaffiifi marii garee wal duraa duubaan dhimma itti bahamaniiru. odeeffannoowwan marii garee, afgaaffiifi daawwannaan walitti qabaman boqonnaa afur jalatti xiinxalamanii jiru. Argannoowwan qorannoo kanaa immoo yoomessa Qarre Buusaa, ilaalchisee, yeroon isaa galgala sa’aatii 10:00-11:00tti, guyyaan Kiphixata, kamisa, Sambata duraafi jiini immoo Fulbaabaa hanga waxabajjiitti Qarreen Buufama.Eessa kan jedhuuf, qe’ee warra gurbaata’a. Namoonni sirna kanaaf barbaadaman kanneen akkamii kan jedhuuf, miinjolii namoota miinjoliin waalessaa waammatan, abbaafi haadha gurbaafi jaarsoliidha. Fakkoomiiwwan meeshaalee achi keessatti argamanii maali kan jedhuuf, qajjiisa tokko kutuun durbumaa ishiitti, margi lalisiitti, cuukkoon hurgaahiitti, bunni duroomiitti, horiin dubbattunis duroomiitti, dhadhaan qabbanaahiitti, itilleen lafa qabadhutti akka fakkeeffaman bira gahamaniiru. Yaboon sirni kun hawaasa Oromoo biratti jaalala, kabajaafi ulfina waan qabuuf maanguddoonniifi abbootiin gadaa xiyyeeffannoo osoo kennaniifi gaarii ta’a. Akkasumas, Waajjirri Aadaafi Tuurizimii Aanaa Tokkee Kuttaayee waraabbii kana yeroo sirni kun adeemsifamu koppii hafuuf irraa dhaloota har’aa hubachiisuun dhaloota egereef akka ta’u osoo taasisanii gaarii dha.