Xiinxala Asoosama Dheeraa Burreen Bifa Tokko Miti: Yaadiddama Dubartummaatiin

Abstract

Kaayyoon gooroo qorannoo kanaa asoosama Burreen Bifa Tokko Miti jedhu yaadiddama dubartummaatiin xiinxaluudha. Qorannoo kanaaf yaadoleen qorataa kakaasan gama barreessitootaatiin xiyyeeffannoon namfakkiilee dubartootaaf kennamu laafaa ta‟uufi yaadiddamoota jiran fayyadamuun ogbarruun Afaan Oromoo qeeqaman gahaa ta‟uu dhiisuu isaati. Keessattuu, qorattoonni yaadiddama dubartummaa fayyadamuun xiinxala taasisan hanga hubannoo qorataatti, baay‟ina asoosamoota afaanichaan barreeffamanii jiraniin yoo walbira qabaman muraasa ta‟uu isaaniiti. Qorannoon kun gosa qorannoo akkamtaatti dhimma ba‟uun, mala iddatteessuu miti carraa keessaa iddatteessuu kaayyeffataatiin kan geggeeffameedha. Maddi ragaa qorannoo kanaas, madda ragaa tokkoffaa yoo ta‟u, ragaawwan asoosamicha keessa jiran gadifageenyaan dubbisuun mala xiinxala barruutti gargaaramuun kan adeemsifameedha. Argannoowwan qorannoo kanaas, asoosama kana keessatti namfakkiileen dubartootaa kanneen akka gaayilaa, dinagdee, jaalalaa, barnootaafi qunnamtii saalaa keessatti jireenya rakkinaafi tuffatamuutiin calaqqisiifamanii akka dhiyaatan bira gahameera. Namfakkiiwwan dubartootaa suuraa akka meeshaa, gara jabeettii, odeessituu, sagaagaltuufi tuffatamtuutti fakkeeffamanii kan dhiyaatan ta‟uu hubatameera. Gahee dubartoonniifi dhiironni asoosamicha keessatti qaban ilaalchisee gama hojiitiin dubartoonni hojii mana keessatti kan daangeffaman yoo ta‟u, warri dhiirotaa garuu hojii manaa alaatti hirmaatanii akka jiran bira gahameera. Gama hawaasummaafi siyaasaatiin gayeen dubartootaaf kanneme kan hinmul‟anneefi qoodni dubartootni qaban kan warra dhiirotaan yoo walbira qabamu kan walhinsimneefi madaalamaa kan hintaane ta‟uun qorannoo kanaan adda ba‟eera. Xumura irratti namfakkiileen dubartootaa akkaataa kanaan bocamanii dhiyaachuun akka qeeqa yaadiddama dubartummaatti hanqina ta‟uun hubatamee jira. Kanaafuu, gara fuulduraatti barreessitootni asoosama Afaan Oromoo barreessan namfakkiilee dubartootaa kalaqa isaanii keessatti karaa madaalamaa ta‟een bocuufi yaada kanarratti xiyyeeffannoo gochuun barbaachisaa ta‟uun ibsameera.