Xiinxala Ergaa Mammaaksoota Oromoo Kanneen Egeree Daa’immaniirratti Dhiibbaa Qaban: Xiyyeeffannoon Godina Shawaa Lixaa Aanaa Ejeree

Abstract

Kaayyoon qorannoo kanaa ergaa mammaaksota Oromoo egeree daa’immaniirratti dhiibbaa qaban, haala qabatama hawaasaa keessatti mammaakaman irratti hundaa’uun dhiibbaan isaan egeree daa’immanii irratti qaban maal akka fakkaatu xiinxaluudha. Ka’umsi qorannichaas mammaaksonni gara gaarii ta’etti dhiiban jajjabeeffamuun osoo ittifufuu qabanii dagatamaa deemuun hawaasni daa’immansaa bocuu keessatti faayidaa irraa argachuu qabu osoo hinargatiin hafuusaati. Malli qorannoo kana keesstti hojiirra oole mala qorannoo akkamtaadha. Sababni malli kun itti filatame mala hiikuufi ibsuun kan kaawwamu waan ta’eefidha. Meeshaalee funaansa ragaa afgaaffiifi marii gareetti fayyadamuun ragaaleen walitti qabamaniiru. Tooftaan iddatteessuu hojiirra oole, iddatteessuu miti carraa keessaa akkayyoofi iddatteessuu darbaab dabarsaa yookaan iyyaafannooti. Maddi ragaa qorannichaas, madda ragaa tokkoffaati.Odeeffannoowwan sassaabamanis haala mammaaksonni naannawaa daa’immaniitti mammaakaman egeree isaanii gara gaarii ta’eetti bocuu keessatti gahee yookaan faayidaa qaban ibsameera. Xiinxala taasifameenis ergaa mammaaksota daa’imman gara gaarii ta’etti dhiibuun egeree isaanii bocuu keessatti gaheen qaban guddaa ta’uusaa, ergaa mammaaksonni daa’imman gara gaarii hintaanetti dhiibuun gara kallattii hinbarbaachifnetti geessuun egeree daa’immanii akka miidhanfi mammaaksonni naannawaa daa’immaniitti mammaakaman yoomessa murtaa’aa kan hinqabneefi yoomessi isaanii kan hundaa’u taate ta’u sanarratti akka ta’e bira gahameera. Mammaaksonni egeree daa’immanii gara gaariitti dhiiban osoo haalli isaan gara dhaloota dhufuuf itti darban mijatee, faallaa kanaa kan ta’an immoo haala itti dhiifamaa deemanirratti hubannoon hawaasaaf kennamee isa kanas barreeffamaan kaa’uun osoo danda’amee gaarii ta’a.