Xiinxala Sirna Gumaa Bineensotaa Baasuu: Godina Shawaa Lixaa Aanaa Jalduu Irratti Kan Xiyyeeffate

Abstract

Kaayyoon Qorannoo Kanaa Adeemsa Sirna Gumaa Bineensotaa Baasuu Godina Shawaa Lixaa Aanaa Jalduu Raawwiii Isaa Hordufuun Xiinxaluudha. Akka waliigalaatti Oromoon naannoo jireenya isaa keessattti wantoota jiraatan waliin nagaan jiraachuuf bosonaafii bineensoota achi keessa jiraatan kan kunuunsu yoo ta’u, seera kana cabsanii yoo miidhaa irraan gahan adeemsa gumaa baasuutiin mirgi isaanii eegama. Kanarraa ka’ee yeroo ammaa kana aadaa gumaa bineensotaa baasuu uummata Oromoo Aanaa Jalduu qorachuun beekkumsa Oromoo tursiisuuf gahee olaanaa qaba. Saxaxni qorannoo kanaa akkamtaa yoo ta’u maddi ragaalee qorannichaa madda ragaa tokkoffaafi madda ragaa lammaffaati. Maddi ragaa 1ffaa maanguddootaafi haawwan hawaasa Aanaa Jalduu dhuudhaa gumaa bineensotaa baasuu irratti beekkumsa qaban yoo ta’an maddi ragaa lammaffaa afeewwan adda addaa walitti qabamanii xiinxalamaniidha.Ragaalee qorannichaa iddattoowwan tooftaalee iddatteessuu miti carraa keessaa kaayyeffataafi darbaa dabarsaatti dhimma bahameera.Meeshaalee funaansa ragaalee kanneen akka af-gaaffii, marii garee xiyyeefannoofi sakatta’a dookimentiitti dhimma ba’amaniiru.Ragaaleen funaanamanis mala xiinxala ragaa ibsaatiin xiinxalamaniiru. Yaadiddama hiikaa, yaadiddama faayideessummaafi yaadiddama seenaa deebisanii ijaaruutti dhimma ba’uun qorannoo kana gaggeessuun danda’ameera.Gama biraatiin argannoon qoranichaa akka agarsiisutti, Aanaa Jalduu keessatti bineensonni lubbuun isaanii nama harkatti darbee gumaan isaanii akka aadaa Oromootti yeroo baafamu qaamaan waan hin argamneef,muka yaabee bu’uun, laga ce’uun naaf araarami haaloo nattin qabatiin jechuun adeemsa walduraa duubaa qabaachuun,balaafi badii hedduu irraa nama oolchuu, meeshaalee itti dhimma bahan kan mataa isaa haaraan akka qophaa’uu qabu bira gahameera.Dabalataanis, yeroo gumaan bineensotaa kun baafamu ogafaan dhimma gumaa bineensotaa baasuu keessatti barbaachisan haala adda addaan dhimma itti bahameera. Yaada furmaata qorannoo kanaa kan ta’an gumaa baasuu baannaan miidhaan adda addaa qe’ee namaa irratti waan dhufuuf sirni kun turuu akka qabuufi ofeeguun gahee nama hundaa ta’uu,dhimmamtoonni hunduu osoo adeemsa walduraa duubaa isaa eeganii aadaan kun akka tursiifamu ta’e gaarii ta’uu, meeshaaleen gumaa bineensotaa baasuu keessatti barbaachisaan akka hindagatamne; Waajjirri Aadaafi Turizimii Aanaa Jalduu beekkumsa gumaa bineensotaa baasuu hawaasa keessa jiru osoo barreeffamaan kuusee duudhaan uummata Oromoo akkaturuuf haala mijeesse gaarii ta’a.