Xiinxala Asoosama Hawwii: Ija Yaaxiina Seenawaatiin

Abstract

Qorannoon kun asoosama dheeraa Afaan Oromoo „Hawwii‟ jedhu irratti, yaaxxina seenawaa fayyadamuun xiinxaluu irratti xiyyeeffata. Ka‟umsi qorannoo kanaa, asoosamni Afaan Oromoon qophaa‟u tokko hagam qabatamaa uummata Oromoo calaqqisa kan jedhu xiinxaluun bira ga‟uudha. Gama biraan, kaayyoon qorannoo kanaa taateewwan asoosama kana keessatti ibsaman addunyaa dhugaa keessatti mirkaneessuu kan danda‟u moo miti kan jedhu mirkansa kennuudha. Qorannoon kun qorannoo akkamtaa yommuu ta‟u, maddi ragaa isaa ammoo kitaabuma qorannoon irratti geggeeffamedha. Iddattoon qorannichaas kitaabuma Hawwiittii. Odeeffannoo barbaachisaan qabxii xiyyeeffannoo qorattuun dursitee qopheeffatte irratti hundaa‟uun kan sassaabame ta‟ee, akkaataa waklfakkeenya isaatiin ragaa sassaabame irratti hiikni kennameera. Hiikni kennames jechaani. Bu‟uuruma kanaan namfakkiileen akkasumas seeneffamootni asoosama kana keessatti argaman haala siyaasdinagdee Oromoo ibsuu akka danda‟anitti kan bocaman ta‟uu hubatameera. Seenaawwan jiran dhugaa Oromoo kan mul‟isuu danda‟anidha. Argannoo gurguddoo hojii qorannoo kanaa ilaalchisee, namfakkiileen bocaman bakka bu‟ummaa sirrii kan qaban ta‟uu, seeneffamni asoosamicha keessa jiru dhugaarraa kan fagaate akka hintaaneefi dhiibbaa Oromoo irra ga‟aa ture kan mul‟isu ta‟uudha. Dabalataan, qorannoo kanaan Oromoon sirnoota Habashaa duraa duubaan Itoophiyaa bulchaa turaniin afaansaa, aadaasaafi eenyummaa namummaa Waaqni isaaf kenne sarbamaa akka ture mirkanaa‟eera. kana malees,asoosama kana keessatti ergaan barreeffaman kanneen akka siyaasaa, amantii fa‟aa yoomessuma(kutaa Oromiyaa) tokko qofaa irratti xiyyeeffatee jira. Kanaaf, gara fuula duraatti kanneen asoosama barreessuu barbaadan kutalee Oromiyaa hundaa keessatti dhiibbaa ummata kana irra gaheefi gahaa jiru hundaa dhoksaa tokko malee saaxiluun akka isaan irra jiru illee ibsameera. Walumaagalatti, asoosamni „Hawwii‟ haala Oromoon keessa ture mul‟isuu akka danda‟utti kan qophaa‟edha